संयुक्त वक्तव्यले कृत्रिम बुद्धिमानिका क्षेत्रमा सहकार्यलाई थप प्राथमिकता
भारत र दक्षिणपूर्वी एसियाली राष्ट्रहरूको संगठन (आसियान)ले आफ्ना व्यापक रणनीतिक साझेदारी सुदृढ गर्ने र क्षेत्रीय डिजिटल रूपान्तरण पहलकदमीहरूलाई अगाडि बढाउने प्रतिबद्धता पुन: पुष्टि गरेका छन्। आज लाओ पीडीआरको भियन्तियानमा आयोजित २१औं आसियान-भारत शिखर सम्मेलनका क्रममा दुवै पक्षले आफ्नो सहकार्यको भविष्यलाई सम्बोधन गर्ने दुई महत्त्वपूर्ण संयुक्त वक्तव्य जारी गरे।
डिजिटल रूपान्तरणलाई अगाडि बढाउने आसियान-भारत संयुक्त वक्तव्यले डिजिटल सार्वजनिक पूर्वाधार (डीपीआई), वित्तीय प्रविधि (फिनटेक), साइबर सुरक्षा, र कृत्रिम बुद्धिमत्तामा (एआई) सहकार्यलाई सुदृढ गर्ने रणनीति प्रस्तुत गरेको छ। समावेशिता, दक्षता र नवप्रवर्तनलाई प्रोत्साहन गर्न डीपीआईको महत्त्वलाई मान्यता दिँदै, भारत र आसियान सदस्य राष्ट्रहरूले प्रभावकारी शासन संरचना विकास गर्न अनुभव आदानप्रदान गर्ने लक्ष्य लिएका छन्।
भारतले आसियान डिजिटल मास्टरप्लान २०२५ (एडीएम २०२५) लाई समर्थन गरेको र क्षेत्रीय डिजिटल रूपान्तरण प्रयासहरूलाई सुदृढ गर्न ‘आसियान-भारत डिजिटल भविष्य कोष’को सुरुवातले महत्त्वपूर्ण कदमको रूपमा सराहना गरिएको छ।
दुवै पक्षले कृत्रिम बुद्धिमत्तामा सहयोगलाई प्राथमिकता दिएका छन्, र यस प्रविधिको जिम्मेवार उपयोग सुनिश्चित गर्न नीति र दक्षता विकास गर्ने योजना बनाएका छन्। यस सहकार्यले एआई प्रविधिहरूलाई पहुँचयोग्य बनाउन, क्षमता निर्माणमा वृद्धि गर्न, र एआईले रोजगारीमा ल्याउने परिवर्तनहरूका लागि जनशक्तिलाई तयार पार्ने उद्देश्य राखेको छ।
क्षेत्रीय स्थिरताका लागि, आसियान-भारत व्यापक रणनीतिक साझेदारीलाई सुदृढ गर्नेसम्बन्धी संयुक्त वक्तव्यले क्षेत्रीय शान्ति, स्थिरता र समृद्धिको प्रतिबद्धता पुन: पुष्टि गरेको छ।
